20 ஆண்டுகளாக ஒடுக்கப்பட்ட வாழ்வாதாரம் கோப்புகளுக்குள் புதைந்த பணிப்பாதுகாப்பு – சேலத்தில் வெடித்த தர்ணா போராட்டம்

சேலம், ஜனவரி 9

தமிழக அரசின் முக்கியமான வளர்ச்சி திட்டங்களை கிராமங்களின் கடைக்கோடிக்கு கொண்டு செல்லும் பணியில் இரண்டு தசாப்தங்களாக ஈடுபட்டு வரும் தமிழ்நாடு மாநில ஊரக மற்றும் நகர்ப்புற வாழ்வாதார இயக்க (TNRLM – TNULM) பணியாளர்கள், இன்று தங்களின் வாழ்வாதார உரிமைகள் பறிக்கப்பட்ட நிலையில் அரசின் அலட்சியத்தை எதிர்த்து தர்ணா போராட்டத்தில் குதித்துள்ளனர்.

சேலம் மாவட்ட ஆட்சியர் அலுவலகம் பின்புறம் நடைபெற்ற இந்த தர்ணா போராட்டம், சாதாரண கோரிக்கைகள் அல்ல; பணிப்பாதுகாப்பு, பணி நிரந்தரம், ஊதிய உயர்வு போன்ற அடிப்படை மனித உரிமை சார்ந்த கோரிக்கைகளுக்கான கடைசி எச்சரிக்கையாகவே பார்க்கப்படுகிறது.

அரசு திட்டங்களை சுமந்த ஊழியர்கள் – அரசால் சுமக்கப்படாத வேதனை

தமிழகம் முழுவதும் பல ஆண்டுகளாக மாநில ஊரக மற்றும் நகர்ப்புற வாழ்வாதார இயக்கத்தின் கீழ் பணியாற்றி வரும் ஊழியர்கள், சுயஉதவி குழுக்கள், வறுமை ஒழிப்பு திட்டங்கள், மகளிர் பொருளாதார மேம்பாடு உள்ளிட்ட அரசின் முக்கிய நலத்திட்டங்களை செயல்படுத்தி வருகின்றனர்.

ஆனால், 20 ஆண்டுகளுக்கும் மேலான சேவைக்கு பிறகும் இவர்களுக்கு பணி நிரந்தரம் இல்லை, நிரந்தர ஊதியமும் இல்லை என்பது பெரும் குற்றச்சாட்டாக எழுந்துள்ளது.

பலமுறை அரசின் கவனத்திற்கு கொண்டு செல்லப்பட்ட கோரிக்கைகள், கோப்புகளில் தூங்கிக் கிடப்பதாக குற்றச்சாட்டு எழுந்துள்ளது. இதனால், பொருளாதார சுமை, குடும்பச் சிரமங்கள், சமூக பாதுகாப்பு இல்லாத நிலை ஆகியவற்றில் இந்த அடித்தட்டு ஊழியர்கள் தள்ளப்பட்டுள்ளனர்.

தமிழகம் முழுவதும் காத்திருப்பு போராட்டம் – சேலத்தில் தர்ணா

இந்தப் பின்னணியில், தமிழகம் முழுவதும் ஒருங்கிணைந்த காத்திருப்பு போராட்டம் நடைபெற்று வரும் நிலையில், சேலத்தில் நடைபெற்ற தர்ணா போராட்டம் அரசின் கவனத்தை ஈர்க்கும் விதமாக அமைந்தது.

தமிழ்நாடு மாநில ஊரக மற்றும் நகர்ப்புற வாழ்வாதார இயக்க அனைத்து பணியாளர்கள் சங்க கூட்டமைப்பு சார்பில் நடைபெற்ற இந்த போராட்டத்தில்,

எஸ். ரமேஷ் – மாநிலத் தலைவர்

இரா. பாலசுப்ரமணியன் – பொதுச் செயலாளர்

ஆகியோர் தலைமையேற்று உரையாற்றினர்.

“நலத்திட்டங்களின் முதுகெலும்பே நாங்கள்” – ஊழியர்கள் குரல்

“அரசின் நலத்திட்டங்கள் வெற்றி பெறுவதற்கு முதுகெலும்பாக செயல்படுவது நாங்கள்தான். ஆனால் அதே அரசு எங்களை நிரந்தரமற்ற ஊழியர்களாக வைத்திருப்பது சமூக அநீதி” என போராட்டத்தில் கலந்து கொண்டவர்கள் ஆவேசமாக குற்றம் சாட்டினர்.

மாநில நிர்வாகிகளை அழைத்து பேசி தீர்வு காண வலியுறுத்தல்

மேற்படி ஊழியர்களின் நியாயமான கோரிக்கைகளை கருத்தில் கொண்டு, தமிழ்நாடு மாநில ஊரக மற்றும் நகர்ப்புற வாழ்வாதார இயக்க அனைத்து பணியாளர்கள் சங்க கூட்டமைப்பின் மாநில நிர்வாகிகளை உடனடியாக அழைத்து பேசி, ஆவணப்படுத்தப்பட்ட தீர்வு வழங்க மாவட்ட நிர்வாகம் மற்றும் மாநில அரசு முன்வர வேண்டும் என போராட்டக்காரர்கள் வலியுறுத்தினர்.

தீர்வு கிடைக்குமா? அல்லது போராட்டம் தீவிரமாவதா?

அரசின் நலத்திட்டங்களை களத்தில் செயல்படுத்தும் ஊழியர்களின் இந்த போராட்டம், இனி அலட்சியப்படுத்தப்பட்டால் அது மாநில அளவிலான பெரும் போராட்டமாக மாறும் அபாயம் இருப்பதாக சங்க நிர்வாகிகள் எச்சரித்துள்ளனர்.