திருச்சியில் தலைதூக்கும் டிஜிட்டல் கள்ள லாட்டரி சாம்ராஜ்யம்?

தமிழ்நாட்டில் லாட்டரி விற்பனைக்கு பல ஆண்டுகளுக்கு முன்பே தடை விதிக்கப்பட்டிருந்தாலும், திருச்சி புறநகர் பகுதிகளில் கள்ள லாட்டரி வியாபாரம் மீண்டும் வேரூன்றி வருவதாக வெளியாகும் தகவல்கள் அதிர்ச்சியை ஏற்படுத்தியுள்ளன.குறிப்பாக திருச்சி வயலூர் சாலை, உய்யக்கொண்டான் திருமலை, அல்லித்துறை மற்றும் சுற்றுவட்டாரப் பகுதிகளில் "மூன்று எண் லாட்டரி" எனப்படும் சட்டவிரோத லாட்டரி விற்பனை வெளிப்படையாக நடைபெறுவதாகவும், தினசரி பல லட்சம் ரூபாய் அளவுக்கு பரிவர்த்தனைகள் நடைபெறக்கூடும் என்றும் பொதுமக்கள் மத்தியில் குற்றச்சாட்டுகள் எழுந்துள்ளன.முன்னொரு காலத்தில் சாலையோர கூடாரங்கள், டீக்கடைகள் மற்றும் சில வணிக நிறுவனங்களின் அருகே மறைமுகமாக நடைபெற்றதாகக் கூறப்படும் இந்த வியாபாரம், தற்போது முழுமையாக டிஜிட்டல் வடிவம் எடுத்துள்ளதாக தகவல்கள் தெரிவிக்கின்றன. வாட்ஸ்அப் மூலம் எண்கள் அனுப்பப்படுவது, அதே வாட்ஸ்அப் மூலம் முடிவுகள் பகிரப்படுவது, UPI, GPay உள்ளிட்ட டிஜிட்டல் பரிவர்த்தனைகள் மூலம் பணம் வசூலிக்கப்படுவது போன்ற நடைமுறைகள் பயன்படுத்தப்படுவதாக கூறப்படுகிறது.இந்த வலையமைப்பின் முக்கிய இலக்காக தினசரி கூலித் தொழிலாளர்கள், பொருளாதார ரீதியாக பாதிக்கப்படுகின்றன. "சில நூறு ரூபாய் முதலீடு செய்தால் ஆயிரக்கணக்கில் பணம் கிடைக்கும்" என்ற ஆசை வார்த்தைகளால் பலர் இந்த வலையில் சிக்குவதாக கூறப்படுகிறது.கேரள மாநில லாட்டரி குலுக்கலின் முடிவுகளை அடிப்படையாகக் கொண்டு மூன்று எண்கள் தேர்வு செய்யும் முறையில் இந்த சட்டவிரோத சூதாட்டம் நடைபெறுவதாகவும், வெற்றி பெற்றவர்களுக்கு மறைமுகமாக பணம் வழங்கப்படுவதாகவும் தகவல்கள் தெரிவிக்கின்றன. இந்த செயல்பாடுகளுக்கு எந்தவிதமான அரசு அங்கீகாரமும் இல்லை என்பதால், இதில் பங்கேற்பவர்கள்சட்டரீதியானஆபத்துகளையும் எதிர்கொள்ள வேண்டிய சூழல் இருப்பதாக சட்ட நிபுணர்கள் எச்சரிக்கின்றனர்.கடந்த காலங்களில் திருச்சி மாவட்டத்தில் கள்ள லாட்டரி விற்பனையில் ஈடுபட்டதாகக் கூறப்படும் பலர் கைது செய்யப்பட்டு வழக்குகள் பதிவு செய்யப்பட்டுள்ளன. இருப்பினும், கைது நடவடிக்கைகள் தொடர்ந்தும் நடைபெறும் நிலையில் இந்த வியாபாரம் முற்றிலும் ஒழியாதது ஏன் என்ற கேள்வி பொதுமக்கள் மத்தியில் எழுந்துள்ளது.வயலூர் சாலை, உய்யக்கொண்டான் திருமலை மற்றும் அல்லித்துறை பகுதிகளில் நடைபெறுவதாக கூறப்படும் இந்த சட்டவிரோத நடவடிக்கைகள் குறித்து காவல்துறை, குற்றப்பிரிவு மற்றும் சைபர் குற்றப்பிரிவு இணைந்து தீவிர கண்காணிப்பு மேற்கொண்டு, அடிமட்ட முகவர்களிலிருந்து பின்னணியில் செயல்படும் முக்கிய நபர்கள் வரை கண்டறிந்து சட்டத்தின் முன் நிறுத்த வேண்டும் என்ற கோரிக்கை வலுத்து வருகிறது.கள்ள லாட்டரி என்பது வெறும் சூதாட்டம் அல்ல; ஏழை மக்களின் கனவுகளையும் உழைப்புப் பணத்தையும் குறிவைக்கும் சமூகச் சீரழிவு. இதை ஒழிப்பது சட்ட அமலாக்க அமைப்புகளின் மட்டுமல்ல, சமூகத்தின் ஒட்டுமொத்த பொறுப்பாகவும் மாறியுள்ளது.